華倫蓄細迎天鵝

猪拉多纳

等足21年「天鵝」終再戰歐洲賽，第1擊肯定小心翼翼，「蝙蝠兵團」未弗入波唔會多！歐霸盃A組賽事，華倫西亞主場對史雲斯，客軍領隊米高盧特立出晒口術，話對手降格打歐霸唔贏就好醜；客軍擺明求1分，英超波防守硬淨易開細盤。

（有線61及201台周五凌晨1時直播）

米高盧特立上季接手史雲斯，球隊順利過渡，擸埋英聯盃並取得本屆歐霸盃資格，「天鵝」自1992年後再次征歐，除睇到米帥有料到外，亦證明史軍進步極大，整體實力不俗，有力於分組賽出線。米帥今仗賽前仲出埋口術，話呢場壓力全喺華倫身上，因為佢哋踢慣歐聯，依家降格已經衰，如果連史雲斯都贏唔到，就非常丟架。
米帥教過西甲知己知彼

米高盧特立2年前教過馬略卡，對西甲非常熟悉；帶領「天鵝」後亦主力斟西甲兵，佢好清楚華倫底細、踢法，知道今場己隊係「Under Dog」，必會以守為主，如果重返歐霸喺勁旅身上搶得1分，佢哋肯定收貨。

華倫今季搵嚟杜傑執教，球隊大踢進攻足球，但經歷3連敗勁失9球後，肯定會執過條防線。踢聯賽同歐洲賽係兩回事，華倫3連大後應會轉攤路，吼1.9倍細盤好過。