中秋佳節華倫變「赤口」 嫦「鵝」奔月支撐下盤

猪拉多纳

中秋佳節變赤口？！歐霸盃分組賽今晚開波，但爭標分子華倫西亞先爆內訌，今季換上新教練杜傑領軍表現一直令人失望，日前杜傑操練前仲公開問隊員係咪唔妥佢，新球員又話唔知自己踢邊，內訌不絕，仲點踢好波吖？今晚佢哋喺歐霸盃A組，主場迎戰實力唔曳嘅英超「天鵝」史雲斯要讓半一，力奇會捧1.91倍下盤！

（有線61及201、廣東體育周五凌晨1:00直播）

華倫喺西甲開咧4戰只得1勝3負，近排3連敗失咗9球波，都咪話唔得人驚。塞爾維亞新帥杜傑履歷唔算好勁，出問題難免會成為箭靶，周一操練前佢直頭公開審問班球員係咪玩嘢，搞到全場靜晒，氣氛唔好又唔齊心，搵鬼同你搏命咩？
華倫頹勢新帥鬧球員

再者，就連球隊搵嚟頂替蘇爾達杜離隊後正箭頭空缺嘅射手杜蘭柏邦，都疑似入錯貨，呢位哥倫比亞箭頭話自己鍾意由翼位帶波殺入禁區搵食，而唔係傳統柱躉中鋒，雖則佢話杜傑搵佢踢咩位都冇所謂，但既然唔啱位自然發揮唔好，剩番個普斯迪加又唔係咩高質素貨色，依家華倫鋒線真係信唔過囉！

史雲斯開季以來表現不過不失，各項賽事共踢8場得3勝2和3負，但要注意係所輸3場包括輸畀勁旅熱刺同曼聯，非戰之罪，至於歐霸盃附加賽不敵比杜路爾全因穩奪晉級資格唔志在。
「天鵝」史雲斯愈踢愈夾

其實講近況，佢哋前仗英超作客砌低西布朗，日前主場對住開季全勝嘅利物浦都搶到1分，成班新兵夾得愈嚟愈好，就算話今仗佢哋有中場柏保路靴南迪斯大腿受傷，唔可以倒戈，但科特迪瓦箭頭韋菲特邦尼總算肋骨傷勢無礙，可以繼續擔正，有佢拍住米捷攻堅係入球保證，真係隨時贏埋都唔奇，受讓就更加抵玩啦！
Data King 華倫主場鬥英兵勝率得5成

華倫西亞主場16次鬥英超球隊得8勝5和3負。

華倫近2場歐戰主場均未能贏波。

史雲斯所在嘅威爾斯，歷來8鬥西甲球隊得1勝3和4負，5成不敗。
乜都玩錦囊 防線水鬥水做「大」騷

華倫同史雲斯都算係進攻型球隊，唔會死守，尤其係主隊近排防線信心麻麻，就算主場都難免有失波。對手史雲斯上仗對紅軍都有唔少漏洞，大家都係貪勝不知輸，睇怕係場入球騷，博1.8倍入球大啦！