車仔富咸吼半場和

猪拉多纳

「西倫敦打吡」一沉一傷

英超尾場上演「西倫敦打吡」，車路士主場迎戰富咸，車仔喺莫連奴第二度領軍下創出老細阿布拉莫域入主後最曳開局，莫帥手上精兵太多，卻未搵到最佳陣容，輪換換到亂晒龍，加上前線三大射手冇料到，難望極速變身，結合近季主場對富咸經常咬唔入嘅往績，今戰可博「半場和」！

（now 621周日凌晨零時30分直播）

車路士剛喺歐聯爆大冷，主場不敵瑞士球隊巴素利，計晒聯賽同盃賽連續四戰不勝，呢個開局成績係阿布入主後最差，其實呢四場波都唔易踢，贏唔到唔奇，但最大鑊係佢哋對上兩戰喺落後情況下無力反擊，情況令人憂慮。教頭莫連奴深知班波未執掂，早就認低威話球隊唔係無敵，希望幫班球員減壓，但阿布及車迷向來要求高，點都唔會接受球隊錄得如此劣績。
輪換亂龍 莫帥未砌掂

車仔冇傷冇病可夫添出擊，喺正常情況下絕對係好事，但莫連奴手頭上太多人用，搞到佢三心兩意試來試去，到依家仲未砌出最可靠班底，一旦踢緊逆境波之時，就會好似近兩戰咁冇晒章法進攻。車仔三大射手丹巴巴亞、費蘭度托利斯及伊度奧喺聯賽同樣未開齋，冇個掂，莫帥今夏有先見之明喪斟曼聯前鋒朗尼，惜未能成事，無論今戰派邊個攻堅，都係信唔過。

富咸大軍現時傷兵滿營，射手拜仁雷斯難望披甲，王牌前鋒貝碧托夫亦上陣成疑，連另一箭頭戴倫賓特都有輕傷，加上門神史基倫堡及守將艾朗曉士都有傷。不過，富咸殘陣都唔會影響佢哋部署，皆因佢哋作客都係疊埋心水死守，大軍近三次作客車路士半場同全場都和晒，趁車仔現時踢落唔順，相信今戰半場頂得住，「半場和」博得過。
領隊Chit Chat

莫連奴(車路士)：我唔會批評球員嘅表現，我哋仍然信任對方，依家最緊要係團結一致，希望喺面對富咸時取得佳績，令大家都開心番！

祖爾(富咸)：可能有球迷覺得富咸應該打入前四，但我哋只係中游球隊，其實依家做得唔錯o架喎，球隊實力比上季強，形勢絕對唔差。