史浩克細頂跌Watt拜仁

猪拉多纳

德甲尾場史浩克04主場對拜仁慕尼黑，雙方啱啱都喺歐聯主場大炒對手，但要留意兩軍近期都強調防守，史浩克聯賽同歐聯3連勝未失一球；拜仁近兩場正式賽事都冇失波，拜仁上季雖然喺歐聯兩回合大炒巴塞7比0，但今季喺新帥哥迪奧拿手上反而學緊巴塞踢波，係一隊仲未成熟而且冇美斯嘅巴塞，球隊現階段無論攻守都跌Watt，近期領先咗亦着重控球，唔急於追求大炒對手，睇番史浩克近兩季主場對拜仁都輸0比2，今場未必會輸得更多，推介有2.29倍好分頭嘅入球細。
保定兄弟鬩牆　

今仗史浩克中場新兵奇雲保定同拜仁中堅謝路美保定兄弟內訌，兩個加納裔德國出生嘅兄弟，當年一齊喺哈化柏林青年軍出身，又一齊為德國U21上陣，其後各自發展，哥哥奇雲保定先後効力過熱刺、樸茨茅夫同AC米蘭，最終決定代表加納國家隊；細佬謝路美保定亦効力過漢堡、曼城然後到拜仁，佢就決定為德國隊効力，兩兄弟表示今晚對決唔會留手，但同時都希望喺將來一齊重返哈化柏林合作，直至退役。