兩軍啦啦隊互片 水手心跳「大」騷娛賓

猪拉多纳

又要鬥波，又要鬥靚，今日場日職橫濱水手對清水心跳，絕對係一場大騷，簡單啲追個1.62倍入球大最划算。

（有線61及201周六晚6:00直播）

呢場波喺水手個老巢三澤球場舉行，嗰度係佢哋由J聯賽元年就開始使用嘅大本營，千祈咪當係中立場呀。既然有主場之利，水手係咪值得秤先呢？理論上係咁講，實質就未必嘞。以往績而論，水手主場16次對清水，只得4勝5和7負，今季雖然响首循環聯賽、聯賽盃雙殺對手，不過呢排佢哋狀態好曳吓，除咗日皇盃贏咗隊不知名物體，聯賽近3戰得1和2負，成3個禮拜未贏過波，你話今日佢哋可以學似首循環咁炒清水5蛋，恐怕冇人會信。
清水4連勝入11粒

清水自從响暑假嗰陣有列當錫、大前元紀、本田拓也加盟同復出之後，愈戰愈勇，最近連日皇盃取得4連勝，總共攞到11個入球，平均每場入到3球咁滯，今場作客橫濱就算輸波，都有本錢省番水手一、兩球，肯定唔會畀呢隊日職「一哥」踢得安安樂樂。

何況呢場波好特別，剛啱宣布同緬甸勁旅仰光聯攜手合作，共同搞市場開發、青訓嘅水手，今日會派出旗下嘅啦啦隊，喺開波前同中場休息期間，同清水嘅啦啦隊鍊過，鬥吓邊個靚啲、邊個舞功高強啲，一場瓣瓣都鬥緊嘅波，索性做埋入球騷有乜出奇？