拉素殺破「狼」下盤荀

猪拉多纳

意甲今晚上演一場近年難得激烈嘅羅馬打吡，掛名主場嘅羅馬火併宿敵拉素。「雌狼」今季突然神勇，開季3戰全勝，氣勢勁爆，今晚當然想贏埋賀一賀啱啱續約嘅「狼王」托迪，不過，考慮到佢哋所贏對手實力普通，怕佢哋只係虛火，加上近年交手往往畀拉素食住，羅馬要讓平半出擊，力奇捧2.09倍下盤！

（開賽時間：周日晚9:00）

羅馬今季改由魯迪加西亞領軍，配合埋美國投資者科水6,600萬歐元買人，引入包括謝雲奴、史杜特文、拿積同貝拿迪亞等，前中後三線都執番正，果然戰鬥力倍升，取得自07/08球季以來，首次嘅開季3連勝。球隊士氣好，日前仲宣布同隊長托迪續約到2016，等佢安心喺度踢到收山，做法當然值得讚賞，不過想話延續佳績贏落去，唔係話靠啖氣就搞得掂。
羅馬近5次交手未贏過

咪話力奇潑佢哋冷水，3連勝所贏嘅只係唔入流嘅帕爾馬、維羅納同利禾奴，今晚撞正宿敵，你估話贏就贏咩？查實佢哋近5次對住拉素，已經係一鋪都未贏過，就連上季尾踢意大利盃決賽，都係輸埋0:1，今次再遇，心理上其實幾輸蝕。

拉素呢邊，開季3戰2勝睇落唔及羅馬，但講到底只係輸畀衞冕嘅祖雲達斯，計狀態其實絕對唔差。「藍鷹」今場雖有莫利繼續停賽，但最緊要係射手高路斯冇病冇痛，呢位德國箭頭過往6鬥羅馬就入咗3球，對攻破「雌狼」大門幾有心得，有佢孭飛入番粒，受讓可以放心捧啦！