基達菲難擋皇馬7-11

猪拉多纳

去親巴拿貝例失4粒

講到「總有一間喺左近」嘅話，相信唔少讀者會即時諗起某間便利店，不過嚟緊隨時成為皇馬嘅代名詞！事關C朗同加里夫巴利呢對以億萬鑄造嘅「7-11」組合愈見對辦，今晚喺巴拿貝面對基達菲呢道「私房菜」，-2「讓主」濕濕碎啦！

（now632周一凌晨1:00直播）
基達菲跨季作客6連敗

皇馬門將卡斯拿斯喺歐聯相隔238日再踢正選，點知踢得14分鐘就受傷換走，都咪話唔慘。但前巴塞門神華倫迪摩拉喺日前接受《點球點》專訪，覺得「聖卡斯」根本係詐傷表達不滿，同時皇馬會長皮里茲亦嚟招「感同身受」，完全體會到皇馬及西班牙最佳門將「聖卡斯」嗰種失落咁話。

卡斯拿斯真傷假傷都好，重點係皇馬喺西甲擔正把守最後一關嘅迪亞高洛迪古斯夠晒穩陣，絕對唔差得過卡斯拿斯之餘，有指左閘法比奧干查奧傷愈復出，串演嘅艾比路亞能夠回歸右路，呢條防線絕對穩固。

再者，皇馬上輪西甲作客2:2賽和維拉利爾，「7-11」首次啟航演出對辦，各省1粒。啱啱歐聯作客加拉塔沙雷，C朗更完成職業生涯第23次帽子戲法，環顧現今西甲，能夠頂得住「7-11」猛烈進襲嘅球隊屈指可數。基達菲作客腳軟情況依舊冇改善，今季兩場吞蛋輸波，計埋上季聯賽更加6連敗，近3次到訪巴拿貝場場例牌失4球，今場想輸少粒都難！