愛斯賓奴「畢」勝無歸

猪拉多纳

「A貨聖卡斯」撐起成條防線

今晚西甲獨腳戲上演神奇球隊對決，開季以嚟踢到曉飛嘅愛斯賓奴同畢爾包將會正面對撼，考慮到畢爾包過去15年造訪「賓佬」未嘗一勝，似乎格食格味濃，加上愛斯賓奴有A貨「聖卡斯」把關，無後顧之憂，主隊小讓平半，力奇捧1.99倍上盤。

（廣東體育周二凌晨4:00直播）

唔計剛啱呢個周日嘅賽事，「賓佬」係西甲6支保持不敗嘅球隊之一，佢哋4戰有2勝2和得8分嘅佳績，表現的確令人眼前一亮。「賓佬」最煞食嘅地方，就係佢哋4戰只係失咗3球，同皇蘇一齊並列防線最硬淨嘅球隊，佢哋件26歲西班牙門神卡斯拿絕對應記一功。
皇馬青訓產品 投「賓佬」重生

卡斯拿（casilla）同皇馬失意門神卡斯拿斯（casillas）個名只係差一個字母，更蹺嘅原來卡斯拿都係「銀河艦隊」出身，可惜佢喺皇馬B隊只得5次出場機會，苦無出頭天，A貨「聖卡斯」喺08年惟有離隊轉投愛斯賓奴試一試運氣。

可惜，去到「賓佬」之後，卡斯拿一樣咁陰功，期間仲曾經外借至低組別球隊，捱到上季，A貨「聖卡斯」終於有更多上陣機會，今季仲連續4場擔正，左飛右撲保住2場冇失波上位添，就連今仗對手畢爾包嘅主帥華爾維迪，都讚佢係西甲最佳門將之一。
畢爾包作客對賽15年未贏過

防線夠穩，「賓佬」條鋒線一樣唔失禮，4戰入咗6球，最重要係佢哋嘅主場氣勢超勁，睇番數據，原來已經令畢爾包連續15年作客對賽不勝，只得5和10負完全唔夠砌，咪話唔得人驚。

係，你可能又會話畢爾包開季4戰3勝，表現比上季好好多，但要注意嘅係佢哋近2戰其實失咗5球，防線唔太可靠，今仗更有前鋒安歷基蘇拿、守將保查伊基沙同巴倫加斯養傷，殘陣出擊，作客「賓佬」睇怕會衰多鋪。