聖保利贏波當食生「塞」

猪拉多纳

主場標青射手順開

一隊波有時順起上嚟真係擋都擋唔住，好似聖保利上仗鬧右閘荒，教練方斯卡大膽用前鋒舒特拉頂上，點知出嚟嘅效果又唔錯喎，隊波仲以2:1打低FSV法蘭克福，取得主場2連勝添！佢哋今晚喺德乙主場迎戰作客麻麻嘅杜塞爾多夫，2.18倍主勝不妨繼續追。

（開賽時間︰周二凌晨2:15）
杜塞爾多夫5件養傷

講順，聖保利射手禾賀克腳風近期同樣咁順，呢位前鋒最近4場射入4球，唔單止成為球隊可靠嘅得分點，仲帶領鋒線連續4場都攻入對手2球，狀態真係Fit到爆。防線方面，右閘贊卡拉今仗可以復出，令陣容更完整，以聖保利聯賽主場4戰贏3場嘅戰績嚟睇，今場對住勢頹嘅杜塞爾多夫，可以話係不勝無歸。

杜塞爾多夫最近諸事不順，上仗主場出擊兼喺早段取得入球，可惜未能保住勝局，畀特雷斯登喺末段追和，都咪話唔打擊士氣。況且佢哋依家傷兵滿營，射手賓斯卓普、中場比連侯辛、後衞拉特卡等5將養傷，實力絕對大打折扣。事實上，杜塞爾多夫今季作客仲未開齋，亦未試過保持清白身，今仗都係不宜沾手。