細盃都要擸車仔強襲史雲頓

猪拉多纳

英超競爭愈來愈激烈，列強今夏大灑金錢買人，唔單止喺聯賽爭得勁，就連啲細盃都唔會放過。以往英聯盃只被視為雞肋，好多球隊都用副選練兵，但依家情況完全唔同，因為佢哋個個都要爭盃向老細同球迷交代，呢類二線盃賽都要搏殺。足球世界變得好快，大家都要與時並進，唔好齋用舊嗰套思維嚟度波。

車路士今夏有莫連奴回歸領軍，增添唔少猛人，呢班波擁有超過20個星級球員，足以應付多線作戰，早被好多行家視為英超奪冠熱門。車仔喺今輪英聯盃作客英甲球隊史雲頓，預期會收起主力，但其實班波不論正選同後備都係咁強，面對英甲球隊起碼超兩班。莫帥回歸首季都要交番張靚嘅成績表，今次唔會放過對手，有力大勝！

（周三凌晨2時45分開賽）
熱刺讓得起維拉

同日熱刺作客阿士東維拉，熱刺係另一支喺今夏大肆擴軍嘅勁旅，現時人腳充裕，情況同車仔差不多，唔少行家都已調高佢哋嘅評級。呢班波有條件殺入前4，由於大軍後備力量強勁，轉戰盃賽一樣保持強勁戰鬥力。維拉演出回穩，預期新季唔使護級，但佢哋兵力有限，冇乜本錢分心爭盃，今次主場受讓都信唔過，呢場要熱刺。

（周三凌晨2時45分開賽）