比勒費爾德主場+1圖利

猪拉多纳

德國盃第二圈今晚展開，直播戲碼係德乙三哥比勒費爾德主場迎戰德甲三哥利華古遜，兩軍實力雖有距離，但黑柴懷疑利華教頭希比亞對盃賽嘅重視程度，何況佢哋近年作客比勒費爾德都贏唔到，黑柴寧願小注博有3.15倍分頭嘅「讓球主勝」。

（無綫翡翠台周三凌晨2時30分直播）

利華古遜今季由希比亞獨力執教，佢清晰講明目標係先保住聯賽三甲，然後再睇吓可唔可以喺歐聯攞到好成績，佢哋上星期歐聯作客對曼聯，喺兩球落後下收起進攻重心孫弘民、悉尼森姆同傑斯寧，結果求仁得仁上周末聯賽大炒緬恩斯。
利華近7次造訪未贏過

依家利華三線作戰忙到嘔，嚟緊聯賽對漢諾威，下周中歐聯又要硬撼西甲皇家蘇斯達，今晚盃仔作客隨時畀部分主力球員休息。 事實上，就算利華強陣想贏亦唔易，佢哋近7次作客比勒費爾德，喺法定時間成績係3和4負未贏過，上次作客贏波已經係1999年，況且利華近年對德國盃慣咗交差了事，上季第三圈止步，前季更加首圈便遭特雷斯登爆冷淘汰。

比勒費爾德上季以德丙主場王身份回升德乙，升班後強勢未盡，近期三連勝殺上三甲，教練史堤芬克藍馬擅激勵球員士氣，加上主場球迷助威，首圈便淘汰甲組隊布倫瑞克，可謂遇強愈強。

另外，前荷蘭國家隊主帥雲馬維克接替日前被炒嘅芬克成漢堡新帥，可望於周三凌晨對格雷特霍夫嘅德國盃領軍。漢堡今季六場聯賽僅一勝，目前聯賽排尾三，今場德國盃可能唔會搏。