巴塞加強版 魯營開「蘇」

猪拉多纳

「巴塞2.0」繼續威！進化版巴塞隆拿今晚喺西甲主場迎戰皇家蘇斯達，「地上最強」喺新帥馬天奴麾下戰術變化勁多，唯一不變嘅係鋒力一樣咁堅，美斯、尼馬同柏度洛迪古斯拍住上，勢炒近況唔掂嘅皇蘇，「-2」照捧1.74倍「讓主」啦！

（now632台周三凌晨2:00直播）
防線更穩 唔使齋靠美斯

前紐維爾舊生教練馬天奴宣布執教巴塞嗰陣，唔少球迷都唔睇好呢位寂寂無聞嘅主帥，不過「地上最強」開咧至今5戰5勝，得18球只失4球，已經接近球會史上最佳開局（首7戰6勝1和），可以睇得出馬帥有料到，最緊要係佢仲係一位革命家，竟然夠膽令巴塞放棄Tiki Taka踢法，早兩日「反擊最強」亦初見成效，控球率曳過華歷簡奴仍能大勝4:0，證明呢支西甲勁旅唔再係獨沽一味，對手自然更難防備。

「巴塞簡單化」另一個優點，就係醫好埋美斯依賴症，上場波「球王」完全冇料到，反而造就柏度洛迪古斯大演帽子戲法，以後美斯再有乜頭暈身慶，巴塞都唔驚冇波入啦！配合「新比利」尼馬又連續4場交出助攻、就算今晚法比加斯會抖一抖，巴塞要射爆皇蘇都冇乜難度！當然，咪忘記反擊簡單踢法亦令巴塞條防線更加穩陣，門將域陀華迪斯信心又返晒嚟，連續兩仗救出12碼，皇蘇想破蛋都相當抿水喇！
皇蘇兼顧歐聯跌晒Watt

講開皇蘇，新季佢哋分心歐聯後跌晒Watt，近4戰1場都贏唔到，當中有3場波仲「食白果」添！最大鑊係呢隊波冇晒入球重心，除咗進入「啞火Mode」嘅卡路士韋拿，阿基列斯同基沙文呢兩位上季嘅主力「士哥拿」都突然冇晒聲氣，憑乜同巴塞鍊呀？
Data King 巴塞對賽例「大」勝

‧近6次兩軍喺巴塞主場對戰，主隊獲全勝，當中4場至少出現3個入球。

‧巴塞近4戰全部開出入球大。

‧美斯喺5場聯賽已經攻入6球，柏度洛迪古斯亦有5球進帳。