國米搶3分 迎新班主

猪拉多纳

費倫馬里奧高美斯長抖

「藍黑軍團」強勢回歸！季前被睇淡爭標機會嘅國際米蘭，估唔到開季以來表現神勇，4戰3勝1和兼係意甲攻守最強球隊。佢哋今晚會有前鋒「大米」迪亞高米列圖復任正選，喺聖西路主場出擊，迎戰冇咗個射手馬里奧高美斯嘅費倫天拿，絕對有力全取3分，作為聽日新股東托希爾正式入主簽約嘅賀禮。國米小讓平半，捧1.75倍上盤啦！

（開賽時間：周五凌晨2:45）
「大米」復出入波信心爆棚

唔計尋晚最新一輪意甲，國米暫以4戰得10分排第3，攻入13球僅失1球，表現令人喜出望外。球隊上輪以7:0大炒新升班嘅薩斯索羅，盡顯強隊本色，最緊要係佢哋喺第3輪聯賽對住班霸祖雲達斯都可以保住唔輸，證明狀態的確唔錯。大軍人腳個個健健康康，連之前傷患嚴重嘅「大米」，復出後上場後備登場都省入2粒，消息話佢今晚會獲主帥馬沙利派做正選，戰意十足下，要入波又有幾難？

更重要一點，傾咗唔少日子嘅班主莫拉堤賣盤一事，上周三終於喺巴黎傾掂數，據聞印尼富商托希爾將會以2.5億歐元（約25億港元）買入70%國米股份，聽日就會舉行簽約儀式。目前養緊傷嘅「藍黑軍」老臣子辛尼迪日前都識做話歡迎新班主，相信今晚成班波都會做場好戲配合吓啦！
紫百合近6次訪聖西路全敗

費倫目前同樣取得3勝1和未輸過，但要注意係佢哋前4輪根本未遇強手，不足為據。再者，佢哋位德國射手馬里奧高美斯因膝傷長抖，家陣只得基奧斯比羅斯單天保至尊，要攻陷國米唔易，考慮埋「紫百合」近6次出訪國米都係輸波而歸，今晚憑乜同人砌吖！
藍黑軍團火力意甲最強

‧國米近11次意甲主場迎戰費倫錄得全勝佳績。

‧「藍黑軍團」進攻火力冠絕意甲，4場合共攻入13球。

‧近6次主場會師費倫，國米取得5次「半場勝」。
國米格食格要「半主」

國米、費倫兩支聯賽不敗之師對壘，勢必激戰連場，但諗住捧「紫百合」嘅朋友要三思。翻查往績，國米近11次喺聖西路迎戰費倫全部贏晒，大有「格食格」味道之餘，更連開4口「半場主勝」，除咗1.9倍主勝諗得過，博好分頭不妨吼實2.5倍「半主」。