主場王鹿角嗒魚腩三神

猪拉多纳

今個星期初不速之客「天兔」被講到破壞力咁勁，好在最終吹唔正嚟香港，好多打工仔當然想星期一起碼放多半日，我妹頭就反而希望呢隻「天兔」能夠「大步跳過」。因為要做直播，我喺十號風球都要照返工o架。
鹿角衝前三踢亞冠

今日見到大分三神呢隊波梗買佢對家鹿島鹿角，三神今季喺日職一無是處，大半季贏過一場咁大把，加埋失咗54球，睇佢哋「失波精華」都要成個鐘，隊波已經唔夠勁，點知連門將清水圭介喺上星期傷出埋，單靠「棵」高松大樹喺前面搵食，唉！唔好話入波，隨時射門起腳都有困難。

鹿島鹿角依家係日職排第四，力爭入三甲踢亞冠盃，所以贏波動機十足。佢哋對住三神一定游刃有餘。除咗大迫勇也呢個球星外，上場達維、梅鉢貴秀後備上陣都有波入，真係全隊狀態都咁弗。仲有鹿角係今季日職「主場王」，得勝率高達八成三，建議三神個副選門將丹野研太練定啲係網執番個波嘅姿勢，以免太密扭傷啦！

（有線64及203台周六下午2時30分直播）
妹頭推介：鹿島鹿角 讓球主勝