皇馬偏要o也魚生粥

猪拉多纳

20億薪酬預算豪過馬體會2倍

西甲今晚爆發「馬德里打吡」！皇家馬德里喺巴拿貝球場迎戰死敵馬德里體育會，雖然馬體會目前聯賽榜壓住「大哥」，不過張峰認為皇馬同巴塞嘅壟斷局面唔會點變，就好似西班牙聯賽會剛公布嘅工資榜，皇馬球星2億歐元（約20億港元）嘅薪酬預算多馬體會2倍有多，證明卡士始終有距離，皇馬小勝機會好大，一於撐3.7倍「讓球和」啦！

（now632台周日凌晨4:00直播）
C朗人工夠養成隊艾美利亞

西班牙聯賽會公布嘅薪酬開支數據顯示，西甲同西乙總薪酬支出比上季下降12%，數額仍高達6.6億歐元，相信大家都估到皇馬同巴塞係頭兩名啦，但你又知唔知佢哋有成2億歐元薪酬預算，遠遠拋離第3位嘅馬體會（6,500至6,700萬歐元），最低嘅艾美利亞同華拉度列等球隊，C朗一個已經高過晒佢哋全隊啦！
巴利傷愈巴拿貝登場

雖然話薪酬高唔代表贏硬，但亦反映皇馬同馬體會仍身處兩個世界，皇馬季初踢落唔夠霸氣，但都有5勝1和不敗成績，其中3場都係「魚生粥」僅贏1粒。消息指王牌加里夫巴利有望復出，喺巴拿貝首度登場，加埋後衞華拉尼、法比奧干查奧等齊齊傷愈回歸，陣容更完整。士哥頻頻嘅C朗同人氣高企嘅艾斯高又有貨交，唯獨賓施馬未上力，睇怕皇馬贏波亦唔贏得多。

馬體會開季6戰全勝同巴塞睇齊，新加盟嘅韋拿極速融入球隊，自己入到波之餘仲不時有助攻，令迪亞高哥斯達、阿達杜倫等保持穩定入球數字，特別係迪亞高哥斯達近2場入3球，今場雖然要作客巴拿貝球場，但佢哋都唔係冇反抗之力，集合種種因素後，皇馬主場小勝一球絕對合理。
Data King 馬體會26戰打吡得1勝

‧馬體會近26次「馬德里打吡」僅得1勝。

‧馬體會箭頭迪亞高哥斯達6場聯賽攻入7球。

‧皇馬近5仗豪取17球，C朗包辦其中9球。
乜都玩錦囊 射手着火熱捧入球大

皇馬喺「馬德里打吡」取得壓倒性優勢，導致贏波賠率被壓低到1.48倍，但眼見馬體會聯賽開咧至今全勝，擔心「銀河艦隊」最後大熱倒灶？咁不妨吼實1.46倍入球大。馬德里雙雄過往對壘不乏入球騷之餘，雙方首席射手迪亞高哥斯達及C朗最近入球停不了，難得中位數仍然定喺2.5球，抵捧！