大溪地 沙足世盃有啟示

猪拉多纳

最近喺國際足協沙灘足球世界盃中，最能體會「鬥心都係天才」呢句說話，就好似已故黑人民權領袖馬丁路德金嘅著名演說「I have a dream」（我有一個夢想），每個人心裏面都要有理想、鬥心，主辦國大溪地正係憑住無窮嘅鬥心，排除萬難，初賽賽和強國美國及擊敗「有錢佬」阿聯酋，半準決賽更狂數阿根廷六個一皮，昨日四強戰硬撼勁旅俄羅斯，先有兩名主力儲夠黃牌要停賽，比賽初段更有一球員領紅被逐，面對重重困難下，大溪地竟一度領先3比2，韌力十足，直至完場前兩分鐘才體力不支倒輸3比5，無緣決賽，只能在今日同巴西爭季軍，但鬥志可嘉非常抵讚。

大溪地多番喺逆境中逃出生天，便可說明體育運動唔單止得戰術及技術，鬥心亦非常重要。佢哋人口只得17萬，位處南太平洋地區，水清沙幼，藉住獨有嘅天然環境及有限資源，專注發展沙灘足球，短短7年嘅時間默默耕耘，最終能夠屢挫強隊，相比之下，擁有13億人口嘅中國及700萬人嘅香港，喺資源充裕下始終未能振興足球，值得反思。
西班牙俄羅斯今爭霸

其實早在季前嘅洲際國家盃，大溪地嘅表現已經令人眼前一亮，佢哋雖然大部分係業餘球員，漁夫、工程師、技工、律師……乜都有，被視為魚腩部隊，但踢得一啲都唔失禮，特別係球員嘅鬥志更加值得一讚，佢哋全場拚搏、永不言敗嘅精神，更係中港球員目前最欠缺嘅。

今日沙足世盃決賽由西班牙火併俄羅斯，如果鍾意睇刺激比賽嘅球迷，就要留意「三色台」嘅直播喇 。
金句：鬥心都係天才嚟