史篤長城 「細」破諾域治

猪拉多纳

由於嚟緊周中有歐洲賽，今晚英超嘅戲碼都幾弱，頭場史篤城主場迎戰諾域治，睇怕都係悶戰一場。史篤城開季至今5場聯賽攞到7分，客軍「金絲雀」就5場聯賽得4分，呢兩班波都係屬於英超中下游球隊，入球能力唔高，小妹預料今仗唔會多士哥，1.62倍「入球細」冇走雞，1.85倍嘅史篤城主勝亦值得一試。

以往粗枝大葉嘅史篤城，喺新帥曉士手下改踢比較幼細嘅組織足球，球迷對呢種改變都好滿意，不過轉型始終需要時間嘅，史篤城嘅進攻反而冇以往高空轟炸咁有效率，但呢班波勝在防守尚算穩陣，所以入波唔多之餘失球亦唔算多，難為睇佢哋比賽嘅球迷要捱吓悶波咁囉。
史篤城球員鬥心一流

史篤城今季贏兩次輸兩次，成績同大家預料嘅差唔多，當中最令小妹印象深刻嘅，就係佢哋同爭標大熱曼城悶和0:0，話晒曼城都係億萬大軍，實力高史篤城多多聲，但史篤城都可以憑「血肉長城」逼和「藍月亮」，一對中路守將梳爾哥斯同賀夫好似左右門神咁，守住史篤城大門，完全超出小妹預期。查實佢哋班球員每場波都踢得好搏命，憑主場之利小勝都唔奇。
諾域治貴價前鋒冇貨交

另邊廂，「金絲雀」諾域治5場聯賽只得1勝1和3負成績，合共只取得4分，表現認真麻麻。諾域治之所以搞成咁，好大原因係破球會轉會費紀錄、喺士砵亭買返嚟嘅荷蘭箭頭雲禾夫斯雲高表現令人失望，開咧戰入咗1粒之後一直食白果，難怪佢哋近4場聯賽只係得1個士哥啦！以佢哋咁疲弱嘅鋒力，要攻破史篤城大門可謂難過登天！