紐卡素受讓半一嗒糖 愛華頓弊在唔識主攻

猪拉多纳

英超今晚獨腳戲由愛華頓主場對紐卡素，「拖肥糖」喺新帥馬天尼斯率領下扮演「羅賓漢」，好聽啲講擔當攔路虎「劫富濟貧」，但其實係「神經刀」遇強愈強、遇弱愈弱。歸根究底，球隊擅守不擅攻，遇上勁旅可憑拚勁周旋，但對住實力相若，甚至稍遜對手，就顯得無從入手，今仗讓半一，未免太被高估。紐卡素近況弗，過往到訪葛迪遜公園球場亦不落下風，下盤值博。

（now 621周二凌晨3時直播）

愛華頓今季經歷換帥，兼有主將費蘭尼離隊，但無損球隊硬淨風格，竟然係聯賽唯一不敗之師。不過要留意5戰僅兩勝，除咗擊敗車路士之外，另外四場表現乏善可陳，對住西布朗同卡迪夫城都入唔到波，上輪全因對手有人被逐，最後7分鐘連入兩球，先至反勝韋斯咸3比2，認真危危乎，凸顯 「拖肥糖」唔識主攻弊病。

講到尾都係馬天尼斯戰術太保守，採用單箭頭，而且一味起用腳風唔順嘅謝拉域擔任正選，反而衝擊力強嘅盧卡古長居後備，因此往往靠中場賴史密夫、巴克里後上攻門，以及巴尼斯罰球絕技，先至入到波。以愛華頓嘅踢法，就算贏都係小勝，讓半一太過火。
作客葛迪遜往績佳

紐卡素季初受到管理層變動及卡比耶罷踢影響成績，但風波已經平息，卡比耶已重返正選行列，專心搏殺，戰績亦穩步上揚。進攻鐵三角雷米、柏比斯施斯、賓艾化合作絲絲入扣，後備席上嘅高法蘭不時有佳作。早前作客對住大勇嘅阿士東維拉，都照樣全取三分而回，確實唔嘢小。紐卡素之前四次作客愛華頓僅一敗，絕對唔輸蝕，可望全身而退。