拿玻里受讓佔仙機

猪拉多纳

「皇馬舊生會」倫敦開P

歐聯死亡F組第2輪喺倫敦上演矚目大戰，由阿仙奴主場火併拿玻里。雙方同樣於首輪旗開得勝，不過阿仙奴陣中唔少傷兵，相反拿玻里在「戰術大師」賓尼迪斯帶領下，部署精密，令兩線作戰都頻頻奏捷，球員信心爆棚，而今夏原本加盟阿仙奴卻臨門撻Q嘅拿軍前鋒希古恩，今次將聯同荷西卡利祖，合力挑戰天價入「廠」嘅奧斯爾，呢次「皇馬舊生會」派對，斯維睇好拿玻里，強捧「讓球客勝」。

（有線61及201台周三凌晨2時45分直播）
肥賓打反擊最耍家

上屆帶領車路士於歐霸封王，令沉寂多時嘅名帥賓尼迪斯鹹魚翻生，食住個勢入主拿玻里，並引入連拿、艾比奧爾、荷西卡利祖等同胞，實力大增，「肥賓」擅於作出針對性部署，因應不同對手制訂戰術，臨場調動靈活多變，不愧為「戰術大師」，難怪拿玻里多線作戰都游刃有餘。

今仗另一焦點係希古恩，佢今夏原本已到達阿仙奴準備接受轉會前嘅體測，但有傳兵工廠主帥雲格因為區區300萬鎊嘅轉會費差價而猶豫不決，搞到皇馬轉頭將佢賣畀拿玻里，呢件事令打算轉戰英超嘅希古恩耿耿於懷，因此難得有機會「倒戈」，佢誓要入多幾粒證明落雲格面，要佢後悔唔買佢係佢走寶。而咁啱佢嘅皇馬舊戰友奧斯爾過檔去咗兵工廠，前隊友碰頭各為其主一樣冇面畀，亦係今場看點之一。
阿仙奴靠藍斯食胡

雙方首輪均打響頭炮，拿玻里勇挫上屆亞軍多蒙特，表現極有說服力，相反阿仙奴幾經辛苦先至險勝馬賽，加上其主攻踢法，正中「肥賓」下懷，拿玻里有荷西卡利祖、咸錫、恩斯治尼等反擊高手，配合射術精湛嘅希古恩，拳拳到肉，實搞到後防唔多穩陣嘅兵工廠騰騰震，況且主隊嘅禾確特、普多斯基、阿歷士張伯倫、耶耶辛洛高仲養緊傷，除咗上周中英聯盃用大量副選，近幾場都冇乜點輪換，眾將已經出現疲態，縱使有奧斯爾同近期大爆發嘅艾朗藍斯支撐大局，但憑二人之力未必讓得起三線平均嘅拿玻里，「讓球客勝」乃不二之選。