熱刺壓榨「平民」安治

猪拉多纳

歐霸盃K組矚目大戰，昔日俄超豪門安治主場對英格蘭熱刺，睇番兩隊近況安治完全冇得打，一於捧2.25倍嘅「讓球客勝」。

自從富豪班主克里莫夫決定撤資後，安治由新貴變返做平民，隊中球星伊度奧、韋利安等紛紛離隊他投，全隊士氣、狀態跌至低點，至今已連續15場不勝，當中有7場更失兩球或以上，今仗對熱刺隨時又會輸多過一粒。

熱刺呢排勢頭強勁，聯賽輸咗畀阿仙奴後近5仗取得4勝1和佳績，上仗對住車仔都可以壓住嚟踢，可見球隊狀態正處巔峰。佢哋今季買咗7個新球員，球隊兵源充足，即使領隊保亞斯或留力出副選，但實力一啲都唔弱，而且班副選為爭表現更加會搏命踢，對上3仗歐霸均大炒對手可見一斑，今仗應可輕鬆全取３分。

（有線61及64台周五凌晨零時直播）