曼城半場咬唔入愛華頓

猪拉多纳

卡士呢家嘢有就有、冇就冇，唔係用錢就買到，好似英超富豪球會曼城咁，佢哋大灑金錢換帥換血，到頭來都係畀德國班霸拜仁擊潰，今輪佢哋回師英超主場迎擊聯賽開季未輸過嘅剋星愛華頓，將會面對極大阻力，預計半場咬唔入對手，博半場和！

曼城主帥比歷連尼自視極高，一直深信球隊有本錢挑戰歐聯冠軍寶座，上場歐聯硬撼去屆冠軍拜仁本來係佢哋證明自己嘅好機會，點知班波踢落露晒餡，明顯怯於對手個勢，控球同射門數字瓣瓣輸，門神赫特震過貓王連番輸近柱波，經過呢一場咁慘烈嘅敗仗，相信對全軍上下打擊都幾大。
兩連敗士氣受挫

計埋上周聯賽不敵阿士東維拉，曼城連輸兩場，一定想盡快止跌，西班牙進攻中場大衞施華傷愈可以復出，中前場基本上人齊，有本錢強攻對手。之不過曼城近季對親愛華頓都好惡踢，對上八次交手贏一場輸六場，上季兩戰「拖肥糖」一和一負，畀人恰到上心口，主勝偏熱絕對唔抵玩！

愛華頓失去主帥莫耶斯及中場重心費蘭尼後未有動搖根基，開季聯賽六戰未輸過，係英超唯一一支不敗之師，新帥馬天尼斯應記一功。「拖肥糖」向曼城借得中場巴利，佢今戰唔可以倒戈，但球隊仲有占士麥卡菲頂上，影響好大。兩軍近四次碰頭三次開出半場和，相信今仗半場都係難分高下。