赫特大讚拜仁無敵手

猪拉多纳

德甲尾場戲碼強，今季主場未逢敵手嘅利華古遜，迎擊上季三冠王拜仁慕尼黑，兩軍都經歷緊魔鬼賽程，今場都係雙方近23日來嘅第7場比賽，對兵源較單薄嘅利華古遜不利，相反拜仁就愈踢愈精神，連啱啱佢哋歐聯對手曼城門將赫特亦大讚，根本冇球隊可以追得上拜仁嘅速度，利華主場都好難頂，拜仁作客讓半一，黑柴推介上盤。
着晒火作客燒利華

「藥廠」利華古遜近況唔曳，至今經過7輪聯賽累積18分，只落後榜首嘅多蒙特同拜仁1分，係球會史上最佳開季成績，近期三線作戰4連勝，主場更加未逢敵手，亦係上季唯一一隊擊敗過拜仁嘅德甲球隊。不過拜仁經過上季三冠後明顯已經去到另一層次，近期連戰連勝過程都相當輕鬆，連曼城嘅英格蘭國家隊門神赫特都話，拜仁嘅速度令佢哋完全冇法子抵擋，相信冇球隊可以跟得上。拜仁喺哥迪奧拿手上已完成磨合階段，作客完曼城仲直接飛去鄰近利華古遜嘅科隆備戰今仗，節省時間同體力。利華今季喺對史浩克同曼聯嘅比賽都顯示防線面對強隊未夠級數，今晚幾難重溫爆冷好夢。