超級中場線撐起兵工廠

猪拉多纳

好多球迷都覺得龍門飛身撲救同前鋒射門得分係最好睇，不過Peter知道圈內人就有唔同睇法，佢哋認為中場先係一支球隊嘅命脈，所以好多球隊依家愈來愈注重中場，踢嘅陣式通常都係4231或者451，甚至出現460嘅「無鋒陣」，務求屯重兵喺中場爭勝。

阿仙奴自英超開咧戰不敵維拉後，聯賽已連贏5場，歐聯分組賽亦兩戰全勝。兵工廠戰績咁犀利，同佢哋以高價簽入德國中場奧斯爾有密切關係，呢位「大眼仔」身價雖高但創造力甚強，不但負起球隊鋪橋搭路嘅工作，有時更會自己攻門取分。
奧斯爾配法米尼天衣無縫

除焦點人物奧斯爾外，阿仙奴今夏免費簽回舊部法米尼亦屬妙着。呢位法國中場喺意甲多年表現麻麻，但一返到酋長球場就重拾昔日好表現，喺球隊四個後衞前面做防守第一道屏障，與奧斯爾一攻一守可謂配合得天衣無縫。

另外，已康復嘅韋舒亞同「遲來的春天」嘅艾朗藍斯，加上阿迪達、辛迪卡索拉及路斯基等球員，令球隊中場於兵源充足可進行輪換，得益嘅自然係球隊。阿仙奴中場線表現出色，令一向有疑點嘅後防受壓機會大大減少，加上法國前鋒基奧特近期表現亦不錯，球隊可謂如魚得水。

Peter一向係中立球迷，阿仙奴頭7星期嘅好表現值得拍掌叫好，因為大家都鍾意睇好波。不過，兵工廠今晚作客「雞肋地帶」西布朗將唔會易踢。西布朗喺英國被稱為Black Country，因為佢哋位處煤炭藍領工人區域，球隊依家由莫連奴其中一位弟子奇勒領軍，近期表現亦非常對辦，今場對阿仙奴嚟講猶如一個「wake up call」。阿仙奴過去7星期嘅優秀戰績，究竟係曇花一現定係真材實料，今場對西布朗相信可見真章。