阿甲超級經典打吡

猪拉多纳

河床食住個勢做贏「加」

阿甲Super Clasico殺到！聽朝河床、小保加呢兩支傳統死敵，會喺紀念碑球場（河床主場）鍊過，咁啱大家踢埋同一套「4-3-1-2」陣式，佔咗地利嘅河床自然秤先，小讓平半博得過。

（開賽時間：周一清晨5:15）

河床、小保加班人撈亂骨頭係人都知，次次交手都火花四濺，淨係睇今場超級經典打吡之前，阿根廷啲網頁出現大量惡搞海報，河迷、保迷瘋狂互踩，就聞到嗰陣火藥味。
小保加主帥亂排陣

但係踢波係靠對腳唔係靠把口，單講呢一點，小保加今次就蝕章咗啲嘞，事關佢哋傷兵滿營，件中場柏保路列迪斯馬、艾曼紐恩素亞、拿候爾沙拉迪、列拜亞洛迪古斯肯定唔踢得之外，最妙係主帥比安基可能諗到冇得諗，連啲傷勢稍為好轉嘅都執番出嚟用，仲要無厘頭亂點鴛鴦添。

「總督」嘅大致部署係咁嘅：列基美中場發辦，艾曼紐傑利迪奧、桑馬天尼斯打雙箭頭，呢3個部署好正路。點知勉強叫做傷愈嘅艾比斯，畀佢捉咗去踢中場，中堅謝西斯文迪斯走去做右閘，因為左大腿筋撕裂抖咗3個禮拜嘅丹尼爾戴亞斯，居然復出鎮守中路，真係唔畀佢嚇死都畀佢激死。

小保加咁唔齊腳，主隊河床自然着數好多，佢哋唔止佔地利，聯賽、南球盃3連勝個勢亦好勁，難怪佢哋個哥倫比亞後衞艾達艾華利斯都話，只要睇得住列基美、Keep住呢輪嘅強勢就實掂喇。查實河床9場阿甲只失5球，防線穩陣到爆，今日只讓平半，至多咪輸半個盤，1.92倍河床上盤抵玩o架。