放棄歐霸備戰積極 弗賴堡搶分冇「蘭」度

猪拉多纳

德甲兩支歐霸盃代表碰頭，由弗賴堡主場迎戰法蘭克福，講賽程兩隊一樣咁惡打，今晚更加係佢哋17日內踢嘅第6場波，不過弗賴堡一早已經放棄歐霸、專攻德甲，周中對西維爾都夠膽玩留力，比賽完咗仲即刻坐凌晨機返德國備戰添，可見佢哋相當重視呢場波，今晚主場出擊仲有得受讓，當然撐「+1」嘅1.52倍「讓球主勝」啦！

（有線61、64、201及203周日晚11:30直播）

弗賴堡今季聯賽仲未開齋，為免捲入護級漩渦，班高層一早就決定咗放棄歐霸盃，以周中對西維爾一仗為例，弗賴堡就call咗賀夫拿、賀恩同舒拉美等「90後」小將隨軍，擺明等班主將抖足搏今鋪。咁都未算，成班波完場後仲即刻坐凌晨3點機返德國，教練史特拉希仲講到明：「德甲先係我哋嘅首選！」講到陣容，上仗停賽嘅中場古特今晚亦可以復出，強陣出擊兼有地利，莫講話1分，就算W埋都仲得。
法蘭克福新星洛迪1月走人

係，法蘭克福目前嘅狀態真係唔錯，可惜佢哋賽前傳出壞消息，中場超新星施巴斯坦洛迪宣布季尾約滿就會離隊，傳聞會過拜仁慕尼黑或者利華古遜，法蘭克福見咁嘅環境，可能喺1月將佢賤價賣走，執得幾多得幾多，核心人物嗌離隊，隊波嘅士氣又點會無影響先得o架，今場作客實在隱憂重重o架。