AC祖記鋒力銳爆「大」戰

猪拉多纳

今晚意甲會上演重頭戲，由衞冕冠軍祖雲達斯主場迎戰AC米蘭，「紅黑軍團」今季聯賽表現繼續低迷，防線又唔掂，唯一好彩嘅係維持強勁火力，有力同「斑馬兵團」合演入球騷，一於直取1.72倍入球大啦！

（開賽時間：周一凌晨2:45）

AC米蘭今季除咗有巴洛迪利開始適應意甲踢法，仲有卡卡回歸，理應可以重返前列，點知「巴神」早前繼續發癲搞到停賽，卡卡又貫徹「玻璃腳」本色再度受傷，結果搞到開咧到依家6場只係得兩勝，當中更只得上場對森多利亞一役先保住冇失波，之前5場平均每場失兩球，反映防線勁流！好彩嘅係就算巴洛迪利停賽，有羅賓奴同華達比沙等射手領銜，仍然取得入球進帳，攻強守弱，難怪今季6場聯賽有5戰開入球大喇。
「老婦人」或派洛蘭迪空襲

一向以防守硬淨見稱嘅祖雲達斯今季頻頻「甩轆」，近7戰就只係得1場可以保住清白之身，今場後防主力巴沙利仲要有傷在身，唔知出唔出得，睇怕都要畀對手省番1、2粒，好彩嘅係雖然射手胡仙歷唔出得，但係由上仗取得進帳嘅加利亞雷拉頂替，加埋狀態大勇嘅保羅普巴，意大利傳媒仲話「老婦人」主帥干地考慮針對AC防守死球唔掂，派高佬洛蘭迪打正前，諗住撼爆「紅黑軍團」條防線，要取得「士哥」唔係難事，仲唔同AC玩鬥攻？等睇「大」騷啦！