賀賢雙飛起孖

猪拉多纳

眼見田泰安、彭利力早早已經開齋得手，剩番一位新騎師歐道樂，跑到十月仲未贏馬，你話佢唔心急就假啦，好在皇天不負有心人，尋日沙田日賽，歐道樂嘅努力終於得到回報。
       
飛快無敵
飛快無敵歐道樂開齋

喺第一場四班1800米，佢策騎賀賢嘅「飛快無敵」上陣，匹馬今季快活谷開鑼夜出過賽，大敗成十個馬位包尾而回，所以賽前人氣麻麻，但點知今場就憑藉好檔之助，出閘非常快速，沿途貼住欄順放，雖然入直路睇落好似被「天賜駿駒」及「手機皇」等駒追到氣咳咁款，最終喺歐道樂奮力策騎下，都捱到返終點贏馬，爆出27倍冷門獨贏，騎者亦終於取得在港嘅首場頭馬，之不過佢可能就興奮過頭，入過磅室之後，先發現跌咗條馬肚帶喺凱旋門，要出去執番。騎者話「飛快無敵」大大步有少少論盡，跑快活谷走外疊好蝕底，反而沙田比較易處理。
       
飛馬之威
飛馬之威離李廐即勝

至於離開李廐轉倉初出的「飛馬之威」，則由韋達操刀勝出。練者賀賢表示：「『飛馬之威』來投時健康甚佳，操練上一直未有遇上太大問題。此駒有些少班利，推算回到四班後，仍有望於1200至1400米爭功。」