奀皮仔操足贏晒

猪拉多纳

　　以今季快活谷開鑼戰去計，A欄似乎對前置馬較有利，當然，後上馬亦有「喜多盈」及「聖驛善」獲勝，但要留意這兩駒也是前中段能攝入內欄等位，然後直路於中外叠爆一段的馬，不然，實力再高也無用武之地。馬匹性能固然重要，但騎師的跑法更是關鍵，那些喜歡「外遊」的騎師，寧願避一避。

　　第五場四班1200米，「海之濤」會否放頭是此場關鍵，但大閘選擇以力留方式出試，真不明白，但能放的話，不排除其贏馬可能性；「頌友」一檔表面形勢好，但大步馬跑急彎恐防不太合適；「紅運福星」跑完前仗後，相隔六日再跑上仗，始終休息時間太短，今次有較長時間回氣兼操足再來，跑法機動又有勇態，大馬到了第三鋪應啱數了；「快快贏」也是此場一路奇兵，上仗贏馬前已由潘頓試谷閘，要睇實。「幾叻仔」上賽前的工夫悠閒又放緩過，算跑得不錯，證明上季尾加罩後上獲殿並非符碌，不過此馬重心過低，步法麻麻，彭利力未必舞得掂；「福駿寶」上仗慢步速所以外叠也上名，但始終是用得唔多的馬，可拖；「奀皮仔」是我十分不服氣的馬，上仗連最後試跑都無，根本無諗過，今次操番正，只要早段積極，力足掃晒。