霍利時搏殺唔手軟 出齊三張王牌

猪拉多纳

馬季話咁快完成咗7次賽事，廿四個馬房頭搭尾都只係相差5W，形勢認真夠晒平均。今季季初唔少中下游倉口都不敢怠慢，如果要同往年嘅急進程度比較，霍利時馬房肯定係變化最明顯嗰幾個之一。佢老哥今季開鑼第一場賽事就憑「常妙星」打響頭炮，之後又喺九月中一次谷中夜賽，成功部署「新妙星」同「金獅快將」贏馬起孖，三扒兩撥就執咗3W，成績絕對不下於葉楚航、蔡約翰同方嘉柏呢啲星級馬房。
       
新妙星
上仗贏來大把在手，進步非凡。
新勝馬打鐵趁熱

睇番以往霍利時訓練馬王「爪皇凌雨」嘅時候，就知佢份人做嘢好講究全盤計劃，部署上絕對唔會話煮到埋嚟至食！就好似今晚夜賽咁，佢就一次過搬晒「常妙星」、「新妙星」同「金獅快將」三隻新勝馬出嚟跑，仲要匹匹都有成三個禮拜或以上嘅休息期，體力上絕對不成疑問，務求將搏殺誤差機率減到最低。
       

上述3駒今趟分別排5檔同8檔，驟眼望落去似乎唔算上風，不過大家千祈咪忘記，今晚快活谷係用A欄作賽，條跑道嘅場地同檔位偏差向來唔算大。再者，霍利時都已經搵到韋達同田泰安呢兩個今季谷草成績最標青嘅騎師幫手，計鬥志同部署，真係無得再挑剔喇！