西班牙裝假9照o趙白俄

猪拉多纳

世盃外歐洲區I組，衞冕嘅西班牙主場迎戰包尾大幡白俄羅斯。雖然「鬥牛國」前線大傷「鋒」，但主帥迪保斯基冇有怕，繼續讓法比加斯裝「假9」使用無鋒陣，對住弱到無倫嘅白俄夠殺有餘，直取讓二球嘅「讓球主勝」。

（now 632周六凌晨4時直播）
法比仔「假鋒」駕輕就熟

由於費蘭度托利斯及韋拿受傷，巴西前鋒迪亞高哥斯達又「變節」受阻，令西班牙前線可用人腳捉襟見肘，教頭迪保斯基見招拆招，以巴塞系嘅無鋒陣迎敵，中場法比加斯續任假前鋒，佢上輪贏芬蘭就奉獻助攻，再客串此職可謂駕輕就熟。

白俄羅斯防線出名曳，上月對住火力麻麻嘅法國，原本領先一粒好地地，點知易邊後頂唔住對方一輪急攻，連失四球大崩潰，今日對住質素更高嘅西班牙難樂觀。況且迪保斯基亦有B計劃，就係換入衝擊力強嘅中鋒尼格度及米捷兩大英超殺手，隨時搞到白俄後防風聲鶴唳，依家西班牙喺打少場下與次席法國同分，有優勢但未安枕，為爭首名出線，今仗實搏甩髀，斯維強捧「讓球主勝」。