澳職開波悉尼打爆嘖射機

猪拉多纳

新一季澳職今日開鑼喇！打頭陣有FC悉尼主場迎戰紐卡素噴射機，原本焦點係睇迪比亞路同希斯基兩大名牌射手對決，不過因為希斯基喺季前熱身賽受傷，變咗今場只係睇意大利「老金童」迪比亞路個人表演。紐卡素噴射機無咗希斯基，入波能力自然大大減弱，咁捧FC悉尼1.9倍主勝正路！

（有線64周五下午4:30直播）
噴射機希斯基膝傷缺陣

FC悉尼開咧前亦有傷兵消息，中場主力艾馬頓喺星期三操練整傷背脊，佢同兩個新人泰安提斯同安東尼斯都好大機會缺席今場比賽。好彩教練法連拿啱啱簽入前墨爾本雄心球員馬菲湯臣，呢位通天老倌可以踢中後場多個位置，而且加盟前已經有喺球隊跟操，今場可以即刻上陣，加埋巴西後防泰亞高高爾浩傷愈復出，最重要係有迪比亞路帶住，影響都唔算嚴重。

紐卡素噴射機今季雄心勃勃，點知希斯基膝頭受傷，肯定錯過季初比賽。雖然佢哋喺季前熱身賽曾經贏過FC悉尼，但當時FC悉尼只係半力出擊，迪比亞路等主將亦冇落場，今次話晒踢聯賽又唔同講法，況且FC悉尼又有主場之利，睇嚟呢架「噴射機」今場都好難飛得起喇！
頂占筍盤：FC悉尼（勝）