科特迪瓦 強細搶胡

猪拉多纳

生死鬥首回合主戰塞內加爾

世界盃外圍賽非洲區上演第三圈首回合，十支非洲勁旅經過抽籤後，將進行主客兩回合賽事，五支勝方直接出線明年巴西決賽周，當中最矚目對決首選科特迪瓦鬥塞內加爾，一支係目前非洲區世界排名最高隊伍，另一支就係歷來世盃成績最好嘅非洲代表，兩個只能活一個，預計首回合大家都會踢得較謹慎，波童捧1.72倍入球細。

（周日凌晨1時開賽）

科特迪瓦目前世界排名十九，係非洲區排名最高隊伍，佢哋對上兩屆都能打決賽周，足證有真材實料。領隊林武治今次點兵亦精銳盡出，主力如杜奧巴、托尼兄弟、謝雲奴、韋菲特邦尼等悉數入選，以此陣容莫講話要爭出線，入到決賽周仍有競爭力。
塞軍上圈不敗好硬淨

塞內加爾最風光時期係02韓日世界盃，當年佢哋於揭幕戰爆冷擊敗衞冕嘅法國，雖然最終於8強被淘汰，但已經追平喀麥隆於90年造出嘅最佳非洲代表成績。經過連續缺席了06、10年兩屆世界盃，新一代嘅塞內加爾國腳開始冒起，紐卡素中鋒柏比斯施斯、波爾多鋒將沙維特及韋斯咸中場迪亞美都係効力球隊嘅必然主力。

塞軍上一圈六場分組賽取得三勝三和不敗成績，如以中位數2.5球計，六場比賽有五場開細，首回合作客鬥牌面比自己高嘅科特迪瓦，相信仍會沿用穩守戰術跟對手周旋，預計入波唔會多，細盤係投X首選。