南韓保帥細守城池

猪拉多纳

森巴兵身嬌肉貴驚怕虎抓

今晚國際賽獨腳戲，由「太極虎」南韓於主場火併明年世界盃東道主巴西。巴西今次遠赴亞洲踢兩場熱身賽，舟車勞頓睇定食，有傳「新比利」尼馬喺訓練中意外受傷，火力大減。相反南韓主帥洪明甫自知上任後成績麻麻，一定加強防守迎敵，加上硬淨到暈嘅球風，吓吓鞋底餅行先，實嚇到班森巴兵唔敢去盡，呢場唔慌多波入，捧細盤好路。

（周六晚7時開賽）
尼馬操練撞傷或休戰

今次國際賽期巴西展開亞洲之行，對完南韓之後，下周中仲要去中國出戰贊比亞，體力消耗唔少，王牌尼馬喺日前嘅操練中，畀隊友靴蘭尼斯撞傷，痛到倒地不起，即時退下火線，據報傷勢唔輕，主帥「大菲」史高拉利今仗可能收起佢，係人都知「大菲」以尼馬為進攻核心打造球隊，若冇咗呢位巴塞前鋒壓陣，加上之前因傷落選嘅箭頭費特，惟有靠次一皮嘅柏圖、祖奧等作先鋒，就算尼馬勉強出得都未好狀態，攻力亦大打折扣。
洪明甫召海外兵搏殺

雖然話熱身賽輸贏無關痛癢，但今仗對南韓教頭洪明甫嚟講非常重要，自世盃外後接手「太極虎」，洪帥領軍6仗僅得1勝，特別係東亞賽悶和中國及輸畀宿敵日本，備受國內傳媒抨擊，係時候要交代喇，佢今次特登召入寄誠庸、孫弘民、金甫炅等外流球星，不容再失。

作為02年世盃帶領南韓奇迹奪得殿軍嘅守將，洪明甫深明球隊硬朗風格，一向係同強隊周旋嘅最大本錢，今仗務必做好防守，實搞到對方老鼠拉龜冇碇埋手，加上班森巴兵身嬌肉貴，見到「太極虎」咁兇悍定必退避三舍，隨時小勝算數，客Ｗ太熱冇肉食，轉玩有2.15倍嘅入球細更佳。