紅鑽主場大反擊

猪拉多纳

4強次回合復仇前鋒

日本聯賽盃四強戰次回合賽事展開，浦和紅鑽首回合作客川崎前鋒輸2比3，回師主場將全力反擊，賽前守將森協良太宣布婚訊沖喜，但大軍本季攻強守弱，好難頂得住敵軍王牌前鋒大久保嘉人，預期今戰又會上演入球騷，捧大盤！

（周六下午4時開賽）

浦和紅鑽首回合作客川崎前鋒一度憑住射手興梠慎三梅開二度贏住兩粒，但去到比賽尾段連失三球，其中大久保嘉人喺79及80分鐘「連擊」成功，反映紅鑽班後衞完全散晒。紅鑽返主場決心收復失地，但佢哋後防無法予人任何信心，就算守將森協良太剛做新郎哥夠旺，恐怕都難以保持不失，相信雙方會炮製唔少士哥，玩大啱數。
水手柏軍又鬥入波

同日另一場四強戰橫濱水手主場對柏雷素爾，水手首回合作客淨吞四蛋，後防又係散晒，佢哋近季對親柏軍都冇好下場，對上十次交手錄得四和六負，完全被剋死。水手今戰將全力反擊，但防線必定會有更多漏洞，柏雷素爾班進攻球員有級數，有力撕破對手防線，呢場睇怕都係多入波，捧大盤。

（周六中午12時開賽）