90後新星爭踢世盃 巴西糟質南韓

猪拉多纳

尼馬跌親PatPat未必打

冇尼馬？使乜驚呀！巴西今晚作客首爾出戰南韓，雖則話賽前突然傳出尼馬跌親個PatPat隨時缺陣，不過「森巴兵團」勝在天才輩出，以奧斯卡杜斯山度士為首嘅「90後三劍俠」同樣有超卓創造力，有本事炮製大量入波。更重要係賽前巴西領隊「大菲」史高拉利話明要用呢場熱身賽揀人踢世盃決賽周，今鋪點到佢哋唔搏，要炒「太極虎」開2.15倍「讓球客勝」有幾難？

（開賽時間：周六晚7:00）

今夏重現「足球王國」本色，勇挫西班牙贏得洲際國家盃嘅巴西，喺「大菲」領導下的確有愈戰愈勇之勢。佢哋近9戰贏8場，氣勢勁爆，被視為出年世盃奪標熱門，陣中首席球星尼馬有「新比利」稱號，有幾好波毋須力奇多講，據聞今晚首爾世界盃球場嘅波飛一早賣晒，當中大部分球迷都係想睇佢。好衰唔衰，前日佢練波同隊友靴蘭尼斯相撞受傷，預計今晚未必會披甲，咁冇咗尼馬嘅巴西仲掂唔掂呢？
「大菲」話明趁機揀蟀

「大菲」公布今次亞洲之旅名單嗰陣講明，世盃決賽周大軍仲有6、7個位未定，即係話部分邊緣國腳仲有機會趕上尾班車，當中包括奧斯卡杜斯山度士、盧卡斯洛迪古斯同班納特安尼斯奧呢3個「90後」天才中場，都仲要為入選努力，今晚對住實力差一截嘅南韓，無論係正選定後備上陣，都肯定會搏命啦！

再者，巴西前線其實爭位一樣激烈，尼馬唔踢得，預料左腳重炮嘅侯克會補上同祖奧合作攻堅，後備席仲有柏圖都想爭表現，贏1球又點會肯收手。唔係講笑，「森巴兵團」之前對住澳洲都炒6粒，你話南韓叻得過澳洲幾多？
洪明甫接掌 「太極虎」走樣

況且「太極虎」主帥洪明甫接手球隊後6戰只得1勝，班波近7戰更加有4場冇波入，表現真係唔合格o架。冇錯，洪明甫今次點兵幾乎叫齊全部外流歐洲嘅國腳諸如孫弘民、李青龍同寄誠庸等回歸，但呢個陣容，上個月主場對住殘陣嘅克羅地亞都輸1:2，今晚搵乜去頂住巴西吖！
Data King 南韓近7戰4場食白果

‧南韓近7戰有4場冇波入。

‧南韓新帥洪明甫領軍6戰只得1勝3和2負。

‧巴西近9戰8勝只得1場冇波入。
乜都玩錦囊 半場W＋「客客」有路捉

如果嫌今場玩客勝得1.38倍太熱，玩「讓客」又怕要贏2球有風險，其實個1.85倍半場客勝同1.95倍「客客」都幾抵玩。睇番巴西近績，自洲際國家盃開始計至今8場，有7勝1負佳績，所贏7場都係由頭贏到落尾，信數據同巴西嘅超班實力，半場客勝同「客客」都值得捧場。