阿爾全國力撐受讓有「基」

猪拉多纳

全國力撐，阿爾及利亞出征夠疊友！呢隻「沙漠之狐」今晚喺世盃非洲區第3圈外圍賽嘅首回合造訪近況唔掂嘅布基納法索，阿爾及利亞足總為咗幫國家隊打氣，特別推出「波飛連交通」嘅半價大酬賓優惠，鼓勵國民出征撐場，相信一班阿爾及利亞國腳實唔想令Fans失望，受讓平半可博1.84倍下盤！

（開賽時間：周日凌晨0:00）
半價「波飛連交通」引Fans

阿爾及利亞國民視波如命，有失業3年嘅受訪者向傳媒表示，只要睇見國家隊躋身2014世盃決賽周，將會掃走晒生活上嘅一切憂慮，證明班球迷係幾咁着緊國家隊。阿爾及利亞足總賽前就掃入超過1,500張客場配額波飛，又同當地旅行社合作，為阿爾及利亞球迷提供「波飛連交通」半價優惠，預期就算作客都肯定大把Fans撐。
布基納法索近況麻麻

將會喺首都瓦加杜古出擊嘅布基納法索係2013年非國盃亞軍，就算因為派遣違規球員落場、導致次圈分組賽被罰扣3分，都照樣以小組第1名躋身第3圈，表現的確係幾硬淨。之不過佢哋近期嘅國際賽表現認真麻麻，對住尼日利亞輸1:4，跟手面對博茲瓦納亦輸0:1，阿爾及利亞有特雷斯登當Fit射手艾奧迪亞同華倫西亞「新施丹」菲侯利孭飛，照計同態沉嘅布基納法索有得鍊。