日聯盃4強次回合 川崎喪攻靠「大」久保

猪拉多纳

日聯盃4強次回合今午連環爆發，浦和紅鑽喺主場對川崎前鋒，因為首回合落後2:3冇得守，焗攻梗係要玩入球大啦，唔好忘記，川崎射手大久保嘉人今季踢到上晒身，而且傷勢好轉復操準備上陣搏殺，大家真係要認住呢個「大」久保！

（開賽時間：周六下午4:00）
紅鑽兩大箭頭隨時候命

紅鑽最大目標係爭聯賽冠軍，不過難得入到日聯盃4強，次回合返主場冇理由放軟手腳，事關佢哋喺07年成為亞冠盃冠軍後，已經5年冇贏過錦標落袋，加上佢哋冇球員入選日本國家隊，意味射手興梠慎三同王牌原口元氣可以繼續搏命，既然紅鑽近6場有5次開大，呢場又邊似會玩守？

對家川崎今季戰績普通，但總算回復喪攻風格，佢哋係今季日職火力最強球隊，現時以21球領先J1射手榜嘅大久保嘉人，更加係入球大嘅保證。原本有消息話，上星期對柏雷素爾整傷手腕嘅大久保，其實經已復操，而且話明要贏個人首個國內重要錦標，堅持落場咁話，有佢唔憂冇波入喎！