巴神領意軍大開殺戒

猪拉多纳

阿美尼亞生死全繫米希達利恩

世界盃外圍賽歐洲區B組，意大利主場對阿美尼亞，意軍已穩奪小組首名出線，次名附加賽資格屬於保加利亞、丹麥及阿美尼亞之爭。阿美尼亞背水一戰，必定豁出去一拚，呢個東歐小國近年人才輩出，効力多蒙特嘅進攻中場米希達利恩功架十足，可對「藍衣兵團」構成嚴重威脅。意大利將有巴洛迪利「火爆」復出，準備大開殺戒，可望上演入球騷，直取大盤。

（now 633及660周三凌晨2時45分直播）
「腦殘」那不勒斯推攝影師

「傳統魚腩」阿美尼亞搖身一變成為今屆外圍賽奇兵，踢到最後一輪仲有得爭附加賽資格，令唔少人跌眼鏡。其實呢個人口唔夠香港一半嘅小國，近年良將湧現，最受矚目必數米希達利恩，呢位24歲球員可以勝任所有進攻位置，多蒙特今夏用近3,000萬歐元收購佢，足以證明佢屬於世界級。米希達利恩喺德甲已轟入3球，盡顯身價，佢首循環亦射破意軍大門，再遇「藍衣兵團」褪色防線，米希達利恩有力重溫舊夢。

意大利喺柏蘭迪利執教下，踢法比以往進取、悅目，但針冇兩頭利，防守力亦大不如前，上仗鬥丹麥，竟然被「中堅賓」賓特拿兩破大門，防線實在不濟，當然唔多唔少亦同球隊已出線，精神唔夠集中有關。意軍踢風流波，估計情況唔會有大改善。好消息係上仗缺陣嘅「腦殘」巴洛迪利已經病愈，仲喺練習賽入波，佢日前抵達比賽城市那不勒斯，不滿電視台攝影師追住佢，於是推開對方，仲想掟爛攝影機。

據悉「巴神」因為未能出戰上仗賽事，覺得好冇癮，加上之前傳佢同那不勒斯黑手黨有聯繫，到達「事發地點」反應難免較敏感，今仗一定要做齣好戲出番啖氣。今季大勇嘅基奧斯比羅斯亦有望披甲，攻力唔成問題。意大利都想主場贏波謝幕，應會主攻對手。