尼馬抖抖柏圖擔正 巴西副選夠o趙贊比亞

猪拉多纳

贏唔停嘅巴西由南韓轉戰中國，今晚會喺北京鳥巢同非洲勁旅贊比亞拍跳。咪以為贊比亞係2012非國盃冠軍，就有能力畀到巴西威脅，查實佢哋今次訪華班波根本係甩皮甩骨，冇正式主帥領軍，隨時又有多達6名主力缺陣，就算話「森巴兵團」或會輪換收起尼馬做後備，都一樣有能力大炒對手，讓2球一於照捧1.82倍「讓主」！

（開賽時間：周二晚7:45）
贊比亞群龍無首

贊比亞喺世盃外非洲區第2圈玩完，排喺加納之後出局，原任主帥連納特今個月初就正式同佢哋解約，轉去教法甲索察，國家隊則由連納特個助手比奧美利暫時接手領軍。

球隊未來發展路向未明，比奧美利未坐正自然冇人畀面，今次點兵，3個來自南非聯賽主力包括前鋒馬比蘇馬、中場穆卡卡梅倫加同守將尼卡素就齊齊高掛免戰牌話有傷喎，至於剛果勁旅馬贊比嘅三劍俠前鋒冼卡拿、中場卡拉巴同後衞辛素，直到尋日都未知球會放唔放人，搞到立立亂兼陣容不整，你話班人邊有心機踢波先？
巴西近10戰9勝

巴西方面，上仗2:0輕取南韓表現繼續Sharp醒，賽前跌親個「八月十五」嘅尼馬結果又生生猛猛落場，仲射入埋靚罰球。賽前消息話領隊史高拉利將會輪換陣容，畀部分主力抖抖，兼畀個最後機會考驗邊緣國腳，包括柏圖、拉美利斯同班納特安尼斯奧等都會擔正，尼馬甚至可能踢後備，不過以「森巴兵團」近期10戰9勝氣勢，加上球員狀態的確唔錯，班後備兵又要博表現爭位，鬥心有保證，要大勝一場又有幾難？