水手櫪木射手大戰

猪拉多纳

馬昆奴斯回魂 「沙基配」弗爆

經過一輪激烈嘅國際賽後，今日重新聚焦喺二線聯賽及盃賽，其中黃昏波日皇盃第3圈橫濱水手喺橫濱三澤球技場面對櫪木ＳＣ。前者貴為日職二哥，日前喺日聯盃4強飲恨出局，乘住射手馬昆奴斯打破入球荒，誓要搵人出氣，不過乙組仔櫪木ＳＣ兩大外援沙比亞及基斯坦奴達施華弗到震，唔怕同對手鬥攻，大盤有計。

（周三晚6時開賽）

橫濱水手今季喺日職表現平穩，現時僅以得失球差不及榜首廣島三箭排第二。不過佢哋喺上周六日聯盃準決賽次回合狂攻之下，只贏柏雷素爾2比0，總比數以2比4被淘汰出局，眾將都覺得好唔抵。好彩早排當黑嘅巴西前鋒馬昆奴斯，上仗終於重拾射門鞋，配合老將中村俊輔後上支援，今日轉戰日皇盃定必加多兩錢肉緊。

不過乙組仔櫪木SC亦非善男信女，尤其係鋒線主力沙比亞及基斯坦奴達施華弗爆，近四仗兩人共轟八粒， 「沙基配」腳風順到冇朋友，面對日職勁旅水手冇乜贏輸壓力，隨時鬥攻博大霧，主W太熱冇肉食，轉玩大盤勝在夠穩陣。
阿盃決賽半場和好路

至於阿根廷盃決賽，聖羅倫素喺中立場硬撼沙蘭迪兵工廠，兩軍日前先喺聯賽碰頭，聖軍打少兩個下輸波，但今仗係決賽就唔同講法，全場打和即互射12碼分勝負，雙方一定會踢得小心翼翼，初段料處於膠着狀態，不妨捧半場和。最後巴甲老牌勁旅聖保羅仍受降班威脅，今次難得喺主場遇上包尾大幡、近四仗失十二球嘅紐迪高，仲唔趁機打落水狗咩？讓球主勝不容錯過。