爭冠護級各有所求 櫻花比馬大打出手

猪拉多纳

一隊死心不息想爭冠軍，一隊死唔斷氣要護級，呢啲波唔使講實打甩髀，所以今晚大阪櫻花對湘南比馬場日職，齋博個1.65倍入球大最正路。

（有線61及201周六晚6:00直播）

日職只剩6輪比賽，排第5嘅櫻花落後今日交手嘅榜首雙雄廣島、橫濱6分，雖則話反超前唔係咁易，不過仲未絕望，何況佢哋少第3嘅浦和只係4分，如果贏晒剩低啲波，起碼有權攞到亞冠盃參賽資格，唔使兩手空空。難怪教頭古爾比呢個禮拜初練波嗰陣，就不斷提醒班人，今季食粥食飯就睇對湘南場波，唔贏就乜都唔好諗。
柿谷題字要贏勁有Heart

湘南一樣冇分落袋就唔掂，佢哋排緊尾三，落後尾四嘅甲府風林5分，未來6場波都係生死戰，鬥心絕對唔曳得過櫻花。

由近況去睇，櫻花聯賽9戰不敗，走勢肯定勁過近3戰未輸過嘅湘南，尤其是柿谷曜一朗、山口螢兩件日本國腳打完太公波歸隊冇穿冇爛，又可以同南野拓實拍住上，呢個攻擊鐵三角表現愈嚟愈成熟，入波當然唔成問題，東瀛新紮前鋒柿谷賽前仲親筆題字話：「主場只有贏波！」咁有Heart，今仗好易又有進帳。但係湘南亦都唔會坐以待斃，佢哋件中場大竹洋平係櫻花舊將，識得點樣對付以前嘅隊友，偷雞入到波唔奇。況且櫻花近6次主場打湘南，開咗5大1細，細嗰場都有兩球交收，做乜唔博入球大呢？