卡斯拿斯下一站……曼城？

猪拉多纳

西班牙鋼門卡斯拿斯有意喺出年1月離隊嘅消息傳出後，報章傳媒立即猜測曼城同埋阿仙奴最有機會成為「聖卡斯」下一站目的地。「藍月亮」優勢在於擁有大批西甲兵，好似大衞施華、尼格度及捷西斯拿華斯都係卡斯拿斯嘅國家隊同袍，人情分搭夠，有可能好似奧斯爾咁，因德國幫坐鎮而選擇加盟阿仙奴。況且同樣嚟自西班牙嘅曼城領隊比歷連尼又鍾情卡斯拿斯，期望為赫特引入良性競爭，激勵呢位「英格蘭門神」減少低級犯錯。
為赫特引入良性競爭

曼城開季至今均呈攻強守弱之勢，除赫特狀態低迷外，其餘防守球員表現亦未見突出，最慘係後防支柱高柏尼又傷，未知能否趕及上陣。幸好因傷缺席6個禮拜嘅新援迪米捷利斯已告復操。坦白講，國際賽期對曼城影響不大，阿古路獲阿根廷足總批准提早返回球會，有充足時間紓緩舟車勞頓之苦。迪斯高、尼格度同樣喺國際賽中爭取入球，反映狀態唔曳，當中波斯尼亞首度躋身世界盃決賽周，更令迪斯高帶住高昂士氣返回球會，隨時搵韋斯咸祭旗。

前線入波不成問題，但防線真要倍加提防，尤其係對手嘅年輕鋒將拉夫摩利臣，最近佢喺英格蘭U21嘅表現極為搶眼，個人梅開二度，其中一球更大顯獨闖龍潭嘅膽識，連過數關射入。呢位曾被費格遜公開讚賞嘅小伙子，絕對係曼城後防心腹大患。

喺度提醒曼聯Fans！今個禮拜對修咸頓嘅直播除咗now621之外，各位智能手機同埋平板電腦用戶更可以下載《now免費電視》app，選擇NOW SPORTS精選體育台，喺周六晚9:45免費收睇呢場直播，可以話非常方便，去到邊睇到邊！