巴塞勒住嬴「讓和」夠砌

猪拉多纳

奧沙縮沙唔送波飛隨時捉蟲

美斯回歸，「奧沙」有難！開季8戰全勝嘅巴塞隆拿今晚造訪奧沙辛拿，「球王」美斯今仗終於傷愈歸位，有佢同尼馬喺前線孭飛攻堅，要砌低隨時畀Fans杯葛嘅奧沙辛拿有幾難？考慮到巴塞今季作客極少炒到盡，捧3.9倍「讓球和」似乎最好路。

（now632台周日凌晨2:00直播）

上月鬥艾美利亞拉傷大腿嘅美斯，喺西班牙時間禮拜一已經復操，要知道巴塞下個禮拜三凌晨就要喺歐聯惡鬥AC米蘭，教練馬天奴肯定會派佢落場，務求令呢位今季喺西甲已經有8球進帳嘅「球王」盡快操起狀態，配合埋「新比利」尼馬領銜鋒線，邊使愁冇波入吖？仲有喎，3位防守大將包括佐迪艾巴、馬斯真蘭奴同佩奧爾都已經傷愈，馬天奴今鋪大把人使。
「地上最強」作客難大炒

主隊奧沙辛拿最近搞出個大頭佛，會方開季承諾鬥皇馬、巴塞、畢爾包同皇蘇嘅賽事，會送80張波飛畀球迷會成員，一來係想報答Fans嘅支持，二來係減低球迷負擔，但禮拜四高層開完會之後，竟然轉軚取消送波飛行動，就連平均票價都大幅加到135歐元（約1,431港元）掠水，消息指唔少球迷辣着咗都計劃拒絕入場。

Fans唔撐，阿根廷中場艾文迪路斯同艾華路施祖度又因傷停問題缺陣，點同巴塞鍊呀？不過咁，「地上最強」今季西甲作客只曾1次炒對手3球以上，讓到「-2」確係太狠，淨贏「奧沙」兩球應該係最合理戰果。