伐木者為復仇「鹽」都照啃

猪拉多纳

今季已經步入尾聲嘅美職，各隊再打多1至2場聯賽，就會進入季後賽階段。聽朝上演嘅西岸榜首大戰，由「一哥」波特蘭伐木者喺主場迎戰「二哥」皇家鹽湖城。伐木者今場只要砌低對手，就可以鎖定西岸聯賽頭3名，唔使踢淘汰賽直入季後賽西岸4強，佢哋今仗肯定冇留手，1.8倍主勝值得支持。

（開賽時間：周日早上10:30）
皇家鹽湖城近5場輸3場

雖然伐木者喺8月三戰皇家鹽湖城，只錄得1和2負成績，不過主帥波特就話球隊今時唔同往日，今次有力全取3分。事實上，佢哋最近喺主場連贏4場之餘，更全部保持清白身，可以見到成班球員有幾Fit，難怪球隊上下都話要把握機會向對手復仇。就算中場達寧頓拿比、守將施維斯達等人繼續休息都唔使擔心。

對手皇家鹽湖城近5場輸3場，上仗喺主場對住爭季後賽無望嘅FC達拉斯都只能賽和對手1:1，信心明顯不足。至弊喺次席射手查維亞摩拉利斯今場坐波監冇得踢，對攻擊力肯定有影響，加上守將東尼貝坦、屈臣施尼保爾未傷好，睇怕好難擋得住一心要爭番啖氣嘅伐木者。