熱刺專食海鮮 維拉冇得剩

猪拉多纳

近9次交手贏6場

周日英超獨腳戲由阿士東維拉主場迎戰熱刺，被視為爭標奇兵嘅客軍，上輪聯賽吞咗韋斯咸3蛋，本來打擊唔細，好彩撞正國際賽期畀佢哋休息回氣，主帥保亞斯執番靚隊波，要反彈贏海鮮波維拉又有幾難？最緊要係熱刺原來近季對住維拉幾乎例執3分，過去9次碰頭就贏咗6場，去到維拉公園未驚過，今場1.82倍客勝點可以錯過先！

（now621台周日晚11:00直播）

唔計尋晚戰果，熱刺目前排喺第6位只落後「一哥」阿仙奴3分，仲喺爭標行列之內。佢哋今季人強馬壯，兼顧埋歐霸盃都冇問題，但講到底，英超爭標同爭入前4踢歐聯先係最大目標，今晚又點會放過實力平平嘅維拉先？睇番陣容，熱刺今仗雖然有中場伊天卡普爾同左閘丹尼路斯養傷，但對整體實力影響唔大，就算右翼艾朗連儂未好得番晒，都仲有個超新星安祖斯唐辛，邊路進攻完全唔受影響。
熱刺連儂未好番晒

前線方面，西班牙兵蘇爾達杜目前喺英超2個入波都只係嚟自12碼，以佢卡士，只要適應番英超節奏，入波肯定陸續有嚟。不過就算佢死火，其實後備席仲有個Fit爆嘅迪科爾，呢位英格蘭國腳今季喺歐霸盃同英聯盃夾埋入咗5球，畀佢後備落場，睇怕一樣可以射爆維拉。
維拉射手賓迪基復出

主隊今季大打海鮮波，曾經贏過阿仙奴同曼城，但就和咗侯城同輸畀紐卡素。首席射手賓迪基自9月受傷養傷至今，即使今仗有望復出掛帥，狀態始終難達高峰。賽前熱刺主帥保亞斯都話會為賓迪基復出作調節，即係有晒準備唔使驚啦！既然熱刺近6次出訪維拉公園贏咗4場，今晚追客勝絕對正路啦！
Data King 維拉主場例失波

‧兩軍近9次交手，熱刺得6勝3和保持不敗。

‧維拉今季有16%傳送係長傳，比率冠絕英超。

‧維拉近14場英超主場戰均有失波，當中有9場輸波。
乜都玩錦囊 保亞斯架「細」穩陣派

熱刺雖然整體實力較主隊優勝，不過講到作客波，領隊保亞斯都係傾向穩中求勝。睇番佢哋今季喺英超3場作客無論贏輸，波膽都係開1:0，今場1.85倍入球細可捧，想好分可以諗諗4.5倍嘅總入球1球。