西甲榜尾大戰鬥志行先

猪拉多纳

艾美利亞有「歷」開齋

尋晚睇完皇馬同巴塞，今晚西甲一於轉轉口味，睇吓「榜尾大戰」又係咩環境！今季仍未開齋嘅艾美利亞主場撲擊排尾二嘅華歷簡奴，可以話係「海軍鬥水兵」，勝負關鍵取決於鬥志居多。新升班嘅艾美利亞為免做「升降機」，季初每場比賽都去到盡，雖然技不如人勝在鬥志一流，今場對住「同呢」球隊加上佔有主場之利，一於捧1.82倍主勝，撐艾美利亞開齋！

（開賽時間：周日晚11:00）
華歷簡奴失波西甲最多

艾美利亞開咧至今未嘗一勝，好大程度在於尾段經常失波，其中有4場係喺85分鐘後「臨尾香」，令原本贏嘅賽事變和，和就變輸。上仗作客西維爾其實表現唔曳，雖然先輸一球，但係好快憑洛迪里奧斯追和，可惜到補時階段再次失波敗走收場。今晚話晒係榜尾大戰，相信球員集中力一定有所提升，加上主場球迷大力支持，絕對可以睇高一線，開齋在望。

對家華歷簡奴雖然叫做贏過兩場，但其實都唔係好得艾美利亞好多，佢哋兩場勝仗都係靠主場之利，作客賽事就全部輸晒，而且失球數字更加係全西甲最高，上仗對皇蘇都係靠莊拿芬韋拿補時階段處理極刑得手，先可以終止6連敗頹勢。今晚榜尾大戰要作客出戰，對水準唔穩定嘅華歷簡奴絕對係一大難關。