德甲「雙堡」碰頭「大」激鬥

猪拉多纳

有前冇後打死罷就

今晚德甲夜場爆發「雙堡大戰」，由奧格斯堡主場迎戰禾夫斯堡，呢兩支同樣有前冇後、失波易過食生菜嘅球隊交鋒，當然會係一場「大」激戰，一於捧1.82倍入球大啦！

（有線61、64、201及203周日晚11:30直播）
奧格斯堡近3戰失8球

論防守，奧格斯堡雖然未算係德甲最差，但係佢哋踢咗8輪聯賽後，平均每場失1.88球嘅數字實在令人冇眼睇，尤其近3場德甲夾埋更係勁失8粒，證明防線完全唔掂，加埋後防主力卡拉雲今場要停賽，有老將奧歷坐鎮嘅禾夫斯堡好大機會咬得入。

雖然奧格斯堡守力唔掂，但火力就一啲都唔弱，佢哋近5戰場場有波入，除咗哈利艾天托普同米利克兩位射手之外，近日落實續約至2017年嘅中場華拿亦都肯定更搏殺，睇番「狼堡」近6戰得1場可以保住清白之身，上仗對布倫瑞克都要輸兩粒，對住實力較強嘅奧格斯堡，似乎都幾難全身而退喎！