波圖火龍摧毀辛尼特

猪拉多纳

今晚歐聯G組波圖主場迎戰辛尼特，焦點所在梗係綽號「變形俠醫」侯克重返葡萄牙首度倒戈，可惜俄超班霸辛尼特歐聯作客例牌走樣，中場發電機韋素更要坐波監，今輪作客出名「堅挺」嘅火龍球場，任得侯克點變，相信都變唔出咩花樣，吼實波圖1.5倍主勝啱數。

（開賽時間：周三凌晨2:45）
辛尼特踢唔掂歐聯

辛尼特雖然喺俄超踢到曉飛，但硬係唔出得大場面，首輪歐聯被馬體會清脆擊敗後，跟手喺自己地頭咬唔入奧地利維也納倒灶和波。過往作客戰績更係慘不忍睹，近兩屆分組賽淨係贏過因為提前出線踢風流波嘅AC米蘭，對住安德列治、尼科西亞呢啲二線球隊都要輸波收場，今輪中場核心韋素仲停埋賽添，大幅削弱攻守轉換能力，就算有侯克孭飛都未必幫到手。

相反波圖個火龍球場出晒名夠硬淨，連續75場葡超冇輸過，上輪歐聯被今季勢如破竹嘅馬體會作客反勝，實屬非戰之罪。再者哥倫比亞孖寶積臣馬天尼斯、祖安昆特路等中前場猛將都候命搏殺，中堅馬爾干彭利拿日前葡盃又傷愈復出，今場再度夥拍富斯尼、法國新星文加拉鎮守防線，攻守俱備配合地利優勢撐得過。