車仔撞散殘陣史浩克

猪拉多纳

回勇3連勝伊度奧翻生

分組賽首戰撻「車」死火嘅車路士，今晚喺歐聯E組出訪德國硬撼史浩克04，趁住主隊傷兵纍纍，要搵到兩件18歲「牛奶仔」擔正排個天殘地缺陣，「藍戰士」要贏波有幾難？最緊要係車仔近況的確回勇，3連勝入夠11粒，連「生銹寶刀」伊度奧都重現光芒，今仗車路士讓平半，一於捧1.98倍上盤啦！

（有線62、202周三凌晨2:45直播）

車仔喺今屆歐聯分組賽首戰「死火」，主場竟然輸畀巴素利1:2，雖則次輪作客布加勒斯特星隊大勝番4:0，但依家佢哋只係排喺小組第3，落後2戰全勝嘅「一哥」史浩克3分。佢哋今晚贏波就有機會重返榜首，可以攞番出線主動權，班球員點會唔努力！
車仔舒賀爾尼有傷上陣成疑

車路士8月尾曾跌入低潮期，連續4場贏唔出，但由9月下旬開始，佢哋近6仗贏出5仗，包括夏薩特、奧斯卡杜斯山度士同拉美利斯都着晒火，入波不絕，到上仗大炒卡迪夫城，就連伊度奧都開齋，即使今場有舒賀爾尼因傷上陣成疑，整體火力依然信得過。至於防線左閘位艾殊利高爾或可復出，即使佢唔得，補上嘅賴恩貝特蘭都一樣唔差吖！
史浩克6件打柴「牛奶仔」孭飛

主隊史浩克表面睇近5戰4勝1和同樣來勢洶洶，不過睇清楚就知所擊敗對手實力普通，上周末聯賽贏布倫瑞克仲要兩度落後下反勝，話就話鬥志十足，查實係防線漏洞多多至真，今仗對手換上車路士仲點會有運行。更加大鑊係，佢哋近排傷兵多到嚇死人，前鋒亨特拉爾、法芬、中場馬高賀查、鍾斯、守將哥拉辛拿斯同柏柏杜普路斯6個都肯定缺陣，奇雲保定又受膝傷困擾，今晚勉強紮住上，仲點踢到好波。

唔係講笑，史浩克日前練波，連已經踢咗落預備組嘅35歲老將艾沙姆都要抽調番上嚟湊數。至於今晚個正選陣，只得18歲嘅哥列斯卡同麥斯美亞都有份，雖則佢哋天份極佳，但經驗不足有排要浸，對住莫連奴嘅烈火戰「車」，唔死一身潺啦！
史浩克穿窿捧入球大

史浩克陣容天殘地缺，近排防線失魂，近7戰就有6場開出入球大。撞正車路士近排亦重拾佳態入波唔少，又係連續3場開入球大，今場追1.78倍「大」冇衰啦！
奇雲保定鍊車全敗

史浩克中場奇雲保定之前响英超搵食4鬥車路士全部輸波。

車路士前鋒丹巴巴亞之前喺德甲搵食4鬥史浩克得2勝2和。

車仔近10次歐聯分組賽有7次首名出線。
歐聯E組