金滿載鬥志旺盛

猪拉多纳

　　今晚谷草C欄賽事，離唔開揀啲跑法唔好咁後嘅馬，排內檔就更加筍，如果同呢條魔鬼跑道作對，真係嫌錢腥，所以，今晚策略係對內檔實力馬睇高一線，但唔好凡內檔都揀，唔通死馬又掟大鎚咩！賭要賭得精，就算輸，亦盡量避免輸得蠢。

　　第六場三班1650米。論實力，「綠豆爽」在三班掹車邊，今次唔係1檔及輕磅，眼尾都未必會望吓佢。上賽田草跑輸，技不如人，實力唔夠都冇法子，重返谷草又唔同講法，前仗直路塞車都差啲有位置，而嗰場賽事嘅對手係硬嘢，比起呢批馬強，如發揮及際遇冇問題，坐住有P。

　　第七場三班1200米。「金滿載」上次屈居第二，潘頓跑成點閣下仲有冇印象？尚有餘㷫嗎？唔係轉彎大讓賽，邊可能畀「萬醒駒」走得甩。

　　算嘞，輸就輸咗，無謂怪責及再插，「金滿載」呢次轉用紅人，睇得出老苗心意，唔怕熱一熱，至怕贏唔到，搵得莫雷拉，盡晒人事，即係一定搏到盡，重磅贏唔贏得晒，則要跑過至知，勝在有無比鬥志。

　　積多福乘勇爭連捷

　　第八場二班1200米。「積多福」應該係配合「金滿載」而來，今晚阿苗想起個孖。上仗「積多福」一轉馬房即剃人眼眉，係咁意贏4個幾身位，完全冇收埋少少嘅騎法，唔係仲有好多分喺手，唔通係得咁多？！

　　今仗升班係會有阻力，好在谷草冇咁難搵食，希望乘勇可再捷。